Հարցազրոյց Իրաքահայ Թեմի Առաջնորդ Գերշ. Տ. Աւագ Արք. Ասատուրեանի հետ

Ն.Ս.Օ.Տ.Տ. Գարեգին Բ. Ամենայն Հայոց Վեհափառ Հայրապետի հրաւէրով, Մայր Աթոռ Ս. Էջմիածին կը գտնուէր Իրաքահայ Թեմի Բարեջան Առաջնորդ Գերշ. Տ. Աւագ Արք. Ասատուրեանը` մասնակցելու Սրբալոյս Միւռօնի օրհնութեան արարողութեան, որուն նաև ներկայ էին Իրաքահայ ուխտաւորներու խումբ մը: Այս առթիւ Սրբազան Հօր հետ հարցազրոյց մը ունեցայ`զրուցելու Իրաքահայութեանն այսօր յուզող հարցերու ու դիմագրաւած դժուարութիւններու մասին, որը համառօտ կը ներկայացնեմ:

Հ: Ցերդ Սրբազնութիւն, կը խնդրեմ, որ ներկայացնէք Իրաքահայութեան վիճակն այսօր:
Պ: 2003-ի պատերազմէն յետոյ, ընդհանուր անապահովութեան պայմաններու բերումով, Իրաքն ապրեցաւ արտահոսք` ամէն մակարդակներով: Յատկապէս տեղի ունեցաւ ուղեղներու արտահոսք: Իրաքահայերը, որպէս Իրաքի քաղաքացիներ, նոյն վիճակին ենթարկուեցան` ապրելով անապահովութեան, ահաբեկչութեան և ենթակառոյցներու ահաւոր փճացման արհաւիրքները: Ահա թէ ինչու Իրաքահայերը արտագաղթեցին դէպի Սուրիա, Յորդանան և Արևմուտք:

Հ: Իսկ ներքին տեղաշարժի մասին ի՞նչ կ’ըսէիք:
Պ: Ներքին տեղաշարժ տեղի ունեցած է Պաղտատ և Պասրա քաղաքներէն դէպի հիւսիսային Քրտական Ինքնավար Մարզ, որու հետևանքով այսօր Իրաքահայոց Առաջնորդարանը` իր զանազան կառոյցներով և անձնապէս մենք, կը գտնուինք նոր մարտահրաւէրներու դիմաց, քանզի Քրտական Ինքնավար Մարզի զանազան քաղաքներու մէջ, ինչպիսիք եղան Տհօք և Էրպիլ քաղաքներու մէջ, ծլեցան նոր համայնքներ: Առաջնորդարանը սկսեցաւ մտածել աճեցնել այս նոր համայնքները, անոնց համար եկեղեցիներ կառուցել: Վերջերս, Տհօք քաղաքի մէջ կատարեցինք Ս. Օծման արարողութիւնը Ս. Ներսէս Շնորհալի նորակառոյց եկեղեցւոյ, մասնակցութեամբ Եգիպտոսի Թեմի Առաջնորդ Գերշ. Տ. Աշոտ Եպս. Մնացականեանի և Դամասկոսի Թեմի Առաջնորդ Գերշ. Տ. Արմաշ Եպս. Նալպանտեանի: Այսօր, երբ քաղաքական վիճակը աւելի նպաստաւոր է և ահաբեկչութեան գործողութիւնները զգալի չափով նուազած են, մեր սպասումն է, որ Իրաքահայերը Իրաք վերադառնան, որպէսզի գաղութը վերականգնէ իր նախկին փայլուն վիճակը, որպէս լաւ կազմակերպուած վիճակ (թեմ)` իր ուրոյն կառոյցներով:

Հ: Իրաքէն հայ արտագաղթողներու թիւը ինչքա՞ն կը կազմէ այսօր:
Պ: Այս թիւն այսօր կը կազմէ մօտ 3000 անձ (անոնցմէ 800-1000 անձ Հայաստան կ’ապրին): Ներկայիս, գաղութի թիւը կը կազմէ 16 հազար անձ:

Հ: Ցերդ Սրբազնութիւն, խորին շնորհակալութիւն կը յայտնենք ձեզ` հարցազրոյցի համար:
Պ: Շնորհակալութիւն:

Հարցազրոյցը վարեց`
Արա Ս. Աշճեան
Հայաստանի մէջ բնակուող Իրաքահայ